கலைமகள் காவடிச் சிந்து

உள்ளமெனும் அன்னமதன் மீது - கலை
     ஊர்தியென நீயமரும் போது -மனம்
      உலவும் திசை பலவும் நிலவும் உனதருளை
      உள்ளும் தமிழ் விள்ளும்

வெள்ளமென நீபொழிந்தாய் அன்று - பெரும்  
      வேந்தனென நான் திரிந்தேன் வென்று - கணம்
      விரையும் வரையிலுமுன்  விரியும் அருள்தினமும்
      மீண்டும் வர வேண்டும்

காதலுடன் ஆழிமறை பாடும் - புலர்
       காலையில் அலைகளெலாம் ஆடும் - இருள்
       கரையும் மறையும் தினம் பறவை உனையழைத்துக்
       கரையும்  கதிர் விரையும்

ஆதியுலகம் முழுதும் பள்ளி - கல்வி
       யார்தருவார் உன்னையன்றி அள்ளி - உன்
       அருளில் தெருளுமுயிர் பெருகும் அறிவுபெறல்
       ஆகும் மடம் போகும்

உன்விரலில் நாதலயம் வாழும் - அதன்
     ஊடுறையும் மேவுசுரம் ஏழும் -எழும்
     ஒலியின் தலைவியென உலகின் மொழிபலவும்
      உன்னால் வரும் முன்னால்

மின்னலென வேண்டும் அருள் வாக்கு- அந்த
     வித்தகத்தை என்னில் உருவாக்கு -கொடும்
     விதிக்கும் விதிக்கும் மதி பதிக்கும் உனதுவரம்
     விருப்பம் தரும் திருப்பம்

ஆயகலை அத்தனைக்கும் தேவி - உனை
     அண்டுகிறோம் உன்பெயரைக் கூவி - உன்
     அடியின் பிடியை இனி விடுவதிலை தருவாய்
     ஆக்கம் மிக ஊக்கம்

மாயவலை சிக்கியுள ஈனம் - தனை
     வாட்டி ஒளி நல்கிடுவாய் ஞானம் -இனி
      வருதல், தருதல் வளம் பெறுதல் அனைத்துமுன்றன்
     வரமே உன் பரமே!

இலந்தை

8- 10-2016