ஐயப்பன் காவடிச் சிந்து

ஐயப்பன் காவடிச்சிந்து

ஞான நாதனைக் காண வேண்டுமேல்

நாட்டுக அருட் தாகம் - பதம்

நாடுவார்க் கிலை சோகம்- அட

நண்ணுமோ வெறும் மோகம் - அவன்

நாடும் அன்பர்கள் கேடறச் செயும்

நல்ல மாமழை மேகம்

பாதகம் தனை மோதி மாய்த்திடப்

பந்தளம் வளர் ஐயன் - அரி

பரமனின் எழில் பையன் - நமைப்

பாதுகாத்திடும் கையன்- படி

பத்தொ டெட்டதன் மேலமர்ந்தருள்

பாலிக்கும் அருள் மெய்யன்

சபரி மாமலை மீதமர்ந்தருள்

தந்திடும்  ஒளி ஜோதி - ஐயன்

சாற்றி வைத்தவை நீதி- அவன்

சத்தியப் பெயர் ஓதி - பதம்

சரண மென்றவர் மரணமஞ்சிடார்

சாருமோ எம பீதி?

காட்டுப் பாதையில் ஏறிச் செல்கையில்

கால்களில் வலு ஏறும்- மனம்

கட்டுக்குள் இளைப்பாறும்- மணி

கண்டனின் பெயர் கூறும் - கொடும்

காமக் குரோதமும் லோப மோகமும்

கண்ணியத்துளே மாறும்

சாமியே சரண் என்னவே பதம்

சாருவார் இனம் ஒன்றே - கொடும்

சாதி பேதமே வென்றே- ஐயன்

சத்திய வழி நின்றே-அந்தச்

சாந்த மூர்த்தியைக் காணுவார் உயர்

சபரிமாமலை சென்றே!

காந்த மாமலை மீதில் ஜோதியாய்க்

காட்சி கண்டிட லாகும்- கூட்டம்

காணக் கோடியாய்ப் போகும்- கண்டால்

கண்ணில் நீர்வழிந் தேகும் - மிகக்

கட்டுப்பாட்டொடு காலடி தொழ

கால பாபமும் வேகும்.