வாராகி திருத்தசாங்கம்

வாராகி திருத்தசாங்கம்.

காப்பு

வாராகி அம்மை வளர்திருத்த சாங்கமிது

சீராய் அமைந்து சிறந்திடவே- நேராக

நின்னருளை நல்கிடுக நேசக் கணபதியே

கன்னல்பா வுக்குநீ காப்பு.

நூல்

1 பெயர்

பச்சைப் பசுங்கிளியே, பார்த்துப் பழந்தின்னும்
மெச்சுபுகழ்ப் புள்ளழகே, வீரமுடன்- இச்சகத்தை
எச்சரிக்கை யாய்க்காக்கும் எம்தேவி பேரென்ன?
உச்சரிப்பாய் வாராகி யே!

2 நாடு

வட்டமாய் ஆரம் வனைந்த கழுத்துடையாய்
மட்டில்லா நம்முடைய வாராகி – இட்டமுடன்
வாழுகிற நாடெதுவோ, வாயுரைப்பாய் பைங்கிளியே,
சூழுமிவ் வண்டமெனச் சொல்.
3 ஊர்-
பூங்காவில் வாழும் புதுக்கிளியே, எம்மன்னை
பாங்காய் அமரும் பதியெதுவோ?- நீங்காத
பத்தி மனங்கொள்ளும் பக்தர்கள் உள்ளங்கள்
சக்திவா ராகியின் ஊர்

4 நதி

மரகதப் பச்சையாம் வண்ணமெழில் கொண்ட
தரமுடைய கிள்ளாய்நீ சாற்று – வரமருளும்
வாகான  வாராகி  மாண்பு  நதியெதுவோ
ஆகாச  கங்கை  அறி

5 மலை

அஞ்சுகமே, பேசும் அழகே,எம் வாராகி
விஞ்சும் மலையை விளம்புகநீ- நெஞ்சம்
கலையாத வெற்றியே கையகத் தாக்கும்
மலையாத வீர மலை.
6 தேர்
செம்மை அலகுடைய தேன்மொழியே, வாராகி
அம்மை ரதமெதுசொல் ஆய்ந்தேநீ -  வெம்மைமிகு
போர்க்களத் தேபகைவர் புன்மனத்தில் அச்சத்தைச்
சேர்க்கும் கிரிசக்ரத் தேர்.

7 வாகனம்

பேசும்பொற் சித்திரமே  பீடு  மிகுந்திருக்கும்
ஆசைப்  பசுங்கிளியே, அம்மையும் – நேசமாய்
ஏறுகின்ற வாகனம் ஏதுரைப்பாய்- மேதியெனக்
கூறும்  எருமையெனக் கொள்.

8 படை

கிஞ்சுகமே, கொஞ்சுகிற கிள்ளையே, மாற்றாரை
அஞ்சவைக்கும்  அன்னை  படையெதுவோ- விஞ்சிக்
கலக்குகிற  வாராகி  கைப்படையே  நீண்ட
உலக்கைப்  படையென்  றுரை.
9 தார்
பஞ்சுச்  சிறகினிலே பச்சை இழைகிளியே
விஞ்சைமிகும்  வாராகி  தாருரைப்பாய் – மஞ்சள்
இழைத்த பசுவண்ணம் ஏறிவறி  மாறு
தழைக்கும் எழில்மஞ்சள்  தார்

10 கொடி

அன்னைநம்  வாராகி  யாதுகொடி  வைத்துள்ளாள்
சின்னஞ்  சிறுகிளியே  செப்புவாய் – என்றைக்கும்
ஆசிதரும்  ஏற்றமுள  அம்மை  திருத்தேரின்
வாசியாம்  வெற்றிக்  கொடி.

நூற்பயன்

இந்தத் திருத்தசாங்  கத்தை  மனம்கொண்டு
வந்தித்துப்  போற்றி  வணங்கிடுவோர்- சந்ததமும்
அன்னை  அருளால்  அகமகிழ  வாழ்ந்திடுவார்
உன்னதமாய்  வாழ்வார்  உயர்ந்து.