பாலாவுக்குப் பாமாலை

பாலாவுக்குப் பாமாலை

புத்தகம் அட்ச மாலை

       பொருந்திடும் இரண்டு கைகள்

பத்தரைக் காக்க வென்றே

       பரிந்திடும் அபயம் ஓர்கை

உத்தம மாக வேண்ட

       உதவிடும் வரத ஹஸ்தம்

இத்தனை வனப்பென் றேயாம்

       இயம்பிட அரியள் பாலா!                  1

மூவுல கத்தும் காணா

       மோகன அழகுத் தெய்வம்

ஏவல்கள் எதுவா னாலும்

       எளிதிலே வீட்டும் தெய்வம்

காவலாய் அமையும் தெய்வம்

       கன்னியாய்  நம்மைக் காக்க

ஆவலாய் இருக்கும் தெய்வம்

       ஆற்றலில் மிகுந்த பாலா!                  2

அண்டமும் குலுங்கும் வண்ணம்

       அடர்திறல் கர்ணீ ஏறிப்

பண்டனின் புதல்வர் வீயப்

       பாலகி யாய்ப்போ ரிட்டாள்

எண்டிசை அனைத்தும் சுற்றி

       எதிரியைக் கலக்கும் காட்சி

கண்டவர் வியந்தார், அன்னை

       கட்டியே அணைத்துக் கொண்டாள்         3

ஒன்பது வயதுக் கன்னி

       உத்தமி, பக்தர்க் குள்ள

புன்னறி யாமை போக்கிப்

       புத்தறி வூட்டும் தெய்வம்

தன்னருள் விளையாட்டாகத்

       தந்திடும் வாலைப் பெண்ணாள்

உன்னதத் தெய்வம் போற்றி

       உயர்பதம் போற்றி போற்றி                4

பாலா உன்றன் ஐம்க்லீம்சௌ                          

       பழகும் நாவில் சொல்லேறிக்

கோலா கலமாய் விளையாடும்

       கொஞ்சிப் பேசும் பெண்ணேநீ

மூலா தாரம் முதலாக

       முடுக்கி விட்டுச் சித்திகளில்

ஏலா தவையும் இயல்வனவாய்

       இயங்க வைப்பாய், காப்பாயே!             5