மதுரை மீனாக்ஷி பஞ்சகம்

மதுரை மீனாக்ஷி பஞ்சகம்

நேரிசை வெண்பா

அம்மா மதுரை அரசி, ஒயிலாகச்

செம்மாந் திருக்கின்ற சீமாட்டி – தெம்பாகத்

தேக நலத்தோடே செம்மையாய் நான் வாழ

ஆகும் நலங்கள் அருள்

அருள்வேண்டி உன்னிடத்தில் யான்கேட்ட பின்தான்

தரல்வேண்டும் என்றால் சரியோ?  - பொருளோடே

எல்லா நலமும் இனியதமிழ் மீனாக்ஷி,

சொல்லாமல் ஈவாய் துணை

துணைவராம் சொக்கருடன் சொக்கி இருக்கும்

இணையிலா ஞான எழிலே – பிணிக்கின்ற

நோய்க்குலங்கள் தாக்கியெனை நோகடிக் காதெனக்கு

வாய்க்கும் நலங்கள் வழங்கு.

வழங்கிச் சிவந்தவளே, மாதரசி, அண்டம்

கழங்கென ஆடும் களிப்பே- முழங்கும்

புகழ்தருவாய், பொன்தருவாய், போதம் தருவாய்

அகம்நிற்பாய் நீயே அரண்.

அரணாகத் தாயே அமைந்துவிடின் சேய்க்குத்

திரணாக வேறுண்டோ செப்பு- சரணாக

நம்பியுனை வந்தபின்னே நாடப் பிறிதுளதோ

அம்மவோ அம்மவம் மா!