வெள்ளமெனப் பொழிவாய்

வெள்ளமெனப் பொழிவாய்!

சிந்து  

கள்ளமிலா மனம் கண்டு வதிந்திடும் கான இசைக் கலையே-உயர்

கல்வி தரு நிலையே

வள்ளல் இவன் தரு வார்த்தைதனில் வரும் வாழ்த்துப் பலிக்குமென-ஒளி

வந்து கொழிக்குமென

பள்ள முறைந்திடு பாமரரும் சொலும் பட்டயமே பெறவே-நலம்

பாவினிலே உறவே

வெள்ளமெனப் பொழி வெள்ளமெனப் பொழி,

வெள்ளமெனப் பொழியே!

எள்ளி நகைத்தவர் ஏளனம் செய்தவர் எண்ணி வருந்திடவே-என்னுள்

ஏற்றம் இருந்திடவே

உள்ள மனைத்திலும் உன்திரு மந்திரம் ஓங்கி நிலைத்திடவே-கவி

ஓடிச் சலித்திடவே

தெள்ளு தமிழ்மொழி தேனருவிப் புனல் துள்ளி வரும்படியே-சுவை

அள்ளித்தரும் படியே

வெள்ளமெனப் பொழி வெள்ளமெனப் பொழி

வெள்ளமெனப் பொழியே!

முள்ளின் முனைதரு கூர்மை எனவரு

மோனை நடம்பெறவேஅதில்

வானம் இடம்பெறவே

கள்ளை,விரைந்திடு காற்றை, புனலினை,

தீயைக் கடைந்தெடுத்தே-சொல்

தேவப் படை தொடுத்தே

அள்ளப் பெருகிடும் ஆற்றல் அதிசயம்

நாவில் பெரும் பொருளை-உன்

நல்ல திருவருளை

வெள்ளமெனப் பொழி வெள்ளமெனப் பொழி

வெள்ளமெனப் பொழியே!

பிள்ளைப் பருவத்தில் உள்ளம் கவர்ந்தெனைப்

பேசிட வைத்தவளே-கவி

வீசிட மொய்த்தவளே

தெள்ளத் தெளியத் தெளியாதன பல

தேர்ந்திடச் செய்தவளே-ஒளி

ஆர்ந்திடப் பெய்தவளே

தள்ளி யிருப்பதும் தாய்க்கழ கில்லையே

சார்ந்தென்றன் நாவினிலே-நான்

சாற்றிடும் பாவினிலே

வெள்ளமெனப் பொழி, வெள்ளமெனப் பொழி,

வெள்ளமெனப் பொழியே!