காயத்ரி பதிகம்

காயத்ரி பதிகம்

"ஒவ்வொரு தெய்வத் திற்கும்

       உள்ளன மந்தி ரங்கள்

அவ்விதம் ஜபங்கள் செய்ய

       அவையவை நன்மை செய்யும்

எவ்வகைத் தெய்வமும் தான்

       ஏற்கிற வண்ணம் இங்கே

செவ்விய மந்த்ரம்  ஒன்று

       செப்பிட வேண்டுகின்றேன்"                1

நாரத முனிவர் கேட்க

       நவின்றனர் திருமால்" ஆமாம்

சீரிய மந்த்ரம், எந்தத்

       தெய்வமும் ஏற்கும் மந்த்ரம்

காரிய சித்தி நல்கும்

       காயத்ரி மந்த்ரம் ஒன்றே

ஓரிரு மூன்று நான்கிற்(கு)

       ஒப்பிலை உண்மை, உண்மை"                    2

காயத்ரி வேத மூலம்

       காயத்ரி ஒளியின் வெள்ளம்

காயத்ரி ஞான மார்க்கம்

       காயத்ரி கருணை ஊற்று

காயத்ரி அகத்தின் ஜோதி

       காயத்ரி ஆன்ம வேதி

காயத்ரி தெய்வ வாக்கு

       காயத்ரிக்கிணை காயத்ரி                  3

தனிவழி செல்ல வேண்டின்

       தடைகளை நீக்க வேண்டின்

இனியொரு வழியே இல்லை

       எனுமிடர் போக்க  வேண்டின்

குனிகிற நிலைமை மாறிக்

       கோபுர மாக வேண்டின்

நினைவிலே காயத் ரீயை

       நிறுவுக , அதுவே போதும்                 4

நீறினைக் கையெ டுத்து

       நெஞ்சிலே காயத் ரீயைச்

சீருர நிறுத்திக் கொண்டு

       ஜெபித்ததைப் பூசிக் கொண்டால்

வேரறப் பில்லி சூன்யம்

       வீழ்ந்திடும், பேசும் பேச்சில்

வீரியம் கூடும், அச்சம்

       விலகிடும், துணிவு சேரும்                5

யாரிதைச் செபிக்கின்றாரோ

       அவருக்கு மட்டுமின்றி

ஊரிலே உள்ளோருக்கும்

       உறவுக்கும், தேசத்திற்கும்

பாரிலே உள்ளோருக்கும்

       பலன்களைக் கொடுக்கு மென்று

நேரிய சாத்தி ரங்கள்

       நிச்சய மாகச் சொல்லும்                         6

காயத்ரி உபதே சத்தைக்

       கடமையாய்ப் பெற்ற பேர்கள்

போயெத்தைச் செய்த போகும்

       பொருந்தும் இம்மந்திரத்தில்

தோயவே மறந்து விட்டால்

       தூய்மையும் குலமும் நீங்கும்

ஆயநற் பொக்கிஷத்தை

       அலட்சியப் படுத்த லாமா?                 7

காலையில் உச்சிப் போதில்

       கதிரவன் கீழே செல்லும்

மாலையில் காயத்ரீயை

       வகையுடன் ஜபித்து வந்தால்

மூலமாம் ஜோதி மெல்ல

       முகிழ்த்திடும், மேலே செல்லும்

ஞாலமும் இனிய தாகும்

       நம்முளே சாந்தி பூக்கும்                   8

எதையிதைக் காக்க வென்றே

       எதையுமே சொல்ல வேண்டாம்

அதுவது  தத்த  மக்கே

       அமைந்திடும் ஒழுங்கில் செல்ல உதவிடும் அன்னை மந்த்ரம்

       "உன்பதம் சரணம்"  என்னும்

பதங்களைச் சொல்லி மந்த்ரம்

       பாவித்தால் அதுவே போதும்!              9

வதனங்கள் ஐந்தும் நம்மை

       வாழ்கெனச் சொல்லும். எங்கும்

முதனிலை வகிக்கும் பேறு

       முந்திடும், கோள்கள் எல்லாம்

அதனதன் தீய போக்கை

       அடக்கியே சுருட்டிக் கொள்ளும்

எதனையும் விஞ்சி நிற்கும்

       இனியகா யத்ரி போற்றி!            10