அகிலாண்டேஸ்வரி கும்மி

ஸ்ரீ அகிலாண்டேஸ்வரி கும்மி

கும்மியடி பெண்ணே கும்மியடி - மிகக்
         கோலாகலமாகக் கும்மியடி
அம்மை அகிலாண்ட ஈஸ்வரியாள் புகழ்

        ஆனந்தமாய்ப் பாடி கும்மிடி

கோதண் ட ராமேசன் பாகத்தினாள் -பதம்

        கூடுவோ ரைக்காக்கும் வேகத்தினாள்

ஏதும் இடரின்றிக் காத்திடுவாள்-நமக்(கு)

        என்றும் நலம்கொண்டு சேர்த்திடுவாள்  -    கும்மியடி

அன்று   வணங்கிய ராமனுக்கு வில்லை

        ஐயன் அளித்தனன் வெல்கவென

இன்றைக்குக் கூறுவேன் வேண்டும் வெற்றியெனில்

        என்றும் அவள்பெயர் சொல்கவென      -   கும்மியடி

என்ன கொடுப்பதவளறிவாள் -அதை

      என்று கொடுப்ப தவளறிவாள்

அன்னதை எவ்விதம் எங்குக் கொடுப்பதென்(று)

        அத்தனையும் அவள் தானறிவாள்         -  கும்மியடி

அன்னையின் சொற்படி ஆக்கம் கொடுத்திட

        அங்கே இருக்கும் சனிபகவான்
இன்னல் கொடுக்காமல், ஏற்றுத் தொழுதிட

        என்றும் இதமாய் அருள்தருவான்          -  கும்மியடி

சித்திரை மாதம் முதல் தினத்தில் -வெயில்

        சேர்ந்து சிவன்மேல் விழுகிறதாம்

புத்தாண்டு வாழ்த்துப் பெறுகிறதாம்- அந்தப்

        பூரிப்பில் மேலும் தொழுகிறதாம்          -  கும்மியடி

அம்மை புகழினைப் பாடுங்கடி- மிக

        ஆனந்த மாகவே ஆடுங்கடி
செம்மைக்கைத் தாளங்கள் போடுங்கடி- கோயில்
      சென்று தொழுதிடக் கூடுங்கடி            - கும்மியடி